潘家榮：擺脫消息牽引 專注兩大關鍵信號

近日美伊戰事再升溫，最新發展係伊朗加強針對商船同油輪嘅襲擊，路透社報道指，伊朗相關威脅已令市場再度擔心霍爾木茲海峽航運受阻，而伊朗方面更揚言油價有機會被推高至每桶200美元。受消息刺激，布蘭特期油周四一度急升逾9%，重上100美元以上，本來因為特朗普早前聲稱戰事快將結束而反彈咗幾日嘅股市，亦隨即再度受壓。

表面上，局勢當然緊張，消息亦繼續日日變。但投資者最容易犯嘅錯，就係被最新消息牽住情緒走。今日見到油輪遇襲，就覺得世界末日。聽到特朗普話快將停戰，就又即刻覺得冇事。問題係，消息可以日新月異，但如果你每一次都跟消息起舞，最後好容易變成高位驚，低位沽，來來回回被市場震走。

所以我仍然係嗰句，真正重要嘅唔係你對戰局有幾多分析，而係你有無一套唔需要靠估嘅應對方法。個股跌穿上月低位，就按紀律減倉。未跌穿，就由得佢繼續行，唔好俾新聞標題嚇親。你唔需要估戰事幾時完，亦唔需要估油價見頂未，你只需要尊重走勢，守住風險線。呢個做法聽落簡單，但往往比分析一大輪國際局勢更加實際。

事實上，戰爭對股市嘅衝擊，好多時都係猛烈但短暫。今次都見到一個幾值得留意嘅現象，就係市場對壞消息嘅反應，開始有鈍化迹象。以南韓 KOSPI 為例，喺3月初美伊戰事急劇升溫時，KOSPI 曾經單日暴跌12.06%，其後南韓政府宣布壓抑燃油價格措施當日，KOSPI 亦跌近6%。但去到今次油輪再遇襲、油價再急抽之下，亞洲股市整體跌幅已明顯收窄，路透社周四所見，亞洲股市普遍只係跌約1%至2%左右。換句話講，壞消息未必少咗，但市場消化壞消息嘅能力，似乎開始強咗。

呢一點其實比消息本身更重要。因為牛市中段一個常見特徵，就係壞消息仍然不斷出現，但市場已經唔再好似最初咁脆弱。當壞消息一次比一次大，但股市每次跌幅反而一次比一次細，就代表資金未必真係想走，反而可能一路等機會再部署。相反，如果連好消息都彈唔起，或者一有壞消息就穿晒重要位，咁先至真係要提高警覺。

所以，現階段我認為焦點唔係花太多精神去估下一單新聞，而係觀察兩樣嘢。第一，手上持股會唔會跌穿關鍵支持，特別係上月低位。第二，市場入面有無啲強勢股已經按捺不住，唔理外圍戰事，都率先向上突破。如果有，呢啲往往先係真正值得你留意嘅方向。因為一個強勢市，從來都唔係等到天下太平先升，而係喺大部分人仍然半信半疑、仍然被壞消息困擾時，強者已經偷偷地行先一步。

你可以驚，但唔好亂。你可以保守，但唔好失去紀律。市況愈反覆，愈要靠機制，而唔係靠情緒。消息日日都會變，但真正幫你守住資本、坐到大浪嘅，始終都係你有無一套清晰嘅做法。

潘家榮
富昌證券業務部高級副總裁